By; Thla Awr
6 May 2017
CHIN IT

Hi siang hngakchia pate hi cu arak fim hrimhrim ko. Science ning in Pathian a um lo tiah an sianginn khaan (class) chung ah a cawnpiaktu an sayapa (Atheist Professor of philosophy) cu Pathian a umnak kong le A nungmi Pathian a sinak kong cu fiang tein Science ning in a fian ter khawh i cuhnu cun an khaan chung siang hngakchia vialte zong an ifiang dih cio i an sayapa cu a pianthar ter khawh, Cu kong cu vawleicung hmun kip tiang in a min a thangmi a si. Hi Siang hngakchia pa le Pathian a zumlotu an sayapa nih Science ning in Pathian a um lonak kong le a umnak kong an i al mi hi rel phu le ruah phu hrim asi ko. Rel hmanh, tampi an fianter chin ve lai.

Saya Pa: Khrihfa na si ko lo maw, ka fapa?

Siang hngakchia: Aw, si ko.

Saya Pa: Si lo cun, Pathian ti mi hi na zumh ko, si ko lo maw?

Siang hngakchia: Zumh tuk ta.

Saya Pa: Asi kunah, Pathian hi a ttha maw?

Siang hngakchia: A ttha tuk ta!

Saya Pa: Pathian nih atuah khawh lomi thil aum maw?

Siang hngakchia: Pathian nih zeizong vialte atuah khawh dih hna.

Saya Pa: A dam lomi dam ter hi thil ttha asi ko lo maw?

Siang hngakchia: A si ko.

Saya Pa: Pathian sinah nifatin te damnak caah tiah thla arak cam lengmang mi ka naupa cancer zawtnak in athi. Pathian nih arak damh lo. Pathian attha tiah zeitin dah na ti khawh?

(Siang hngakchia pa cu a holh lo)

Saya Pa: Na thei ve lo si ko lo maw? A silo cun kaan hal than lai. Pathian hi a ttha maw?

Siang hngakchia: TTha!

Saya Pa: Seitan tah a ttha maw?

Siang hngakchia: Ttha lo.

Saya Pa: Seitan aser tu hodah asi?

Siang hngakchia: Pathian

Saya Pa: Kha si ko. Vawlei cungah hin thil tthalo aum maw?

Siang hngakchia: Um ko.

Saya Pa: Zeizong vial te ser tu Pathian asi ko lo maw?

Siang hngakchia: Si ko.

Saya Pa: Si lo cun ho nih dah thil tthalo hi arak ser kun?

(Siang hngakchia pa cu a holh lo)

Saya Pa: Zawtnak, thihnak, huatnak, remlonak ti bantuk thil ttha lo pawl hi vawlei cungah an um, si ko lo maw?

Siang hngakchia: An um ko.

Saya Pa: Si lo cun honih dah mah hna hi arak ser hna?

(Siang hngakchia pa cu holh loin aum tthan)

Saya Pa: Teihpaan (Sceience) nih vawlei cungah minung nih kan pawngkam thilri zeidah an si, an um tak maw tiah kan theih khawhnak caah mit in hmuh, hna in theih, lei in a thawtnam theih, hnar in arimhmui theih, silole taksa in tongh chun bal hna ahau ati. Cucaah, Pathian na mit in na hmu bal maw?

Siang hngakchia: Hmu ballo.

Saya Pa: Pathian aw na hna in na thei bal maw?

Siang hngakchia: Thei ballo.

Saya Pa: Pathian na tawng bal maw?

Siang hngakchia: Tawng ballo.

Saya Pa: Pathian athawtnam na thei bal maw?

Siang hngakchia: Thei ballo.

Saya Pa: Pathian arim na thei bal maw?

Siang hngakchia: Thei ballo.

Saya Pa: Mah cu asi ko mi cu na zumh rih ko maw?

Siang hngakchia: Zumh rih ko.

Saya Pa: Hmuh khawh, tongh khawh, le test khawh asi lo caah Teihpaan nih na Pathian hi aumlo ati. Zeitin na ruah?

Siang hngakchia: Zeitin hmanh ka ruat hlei lo saya. Zumhnak pakhat lawng cu fek tein kaa tleih ko.

Saya Pa: Zumhnak? Mah zawn te bak cu Teihpaan (Science) nih aduh lo mi cu asi. Mit nih ahmuh khawh lomi, taksa nih atongh khawh lomi, hna nih atheih khawh lomi, lei nih athawtnam atheih khawh lomi, le hnar nih arim atheih khawh lomi pawl kha Teihphan nih hi vawlei cungah aummi thil ah achia lo.

DOWNLOAD <<

Siang hngakchia: Saya, asi locun, kaan hal ve lai. Lumnak(heat) timi hi aum maw?

Saya Pa: Aum ko.

Siang hngakchia: Kihnak (cold) timi hi tah aum maw?

Saya Pa: Aum ko.

Siang hngakchia: Saya, na palh. Kihnak timi hi aum lo.

(An khan vialte an dai dih)

Siang hngakchia: Saya, lumnak timi hi a tampi zong um khawh asi, atlawm te zong um khawh asi, cun umlo lawlaw zong asi kho. Sihmanhsehlaw, kihnak timi thil hi amah dang tein aum lo. Temperature hi -458 degree tangleng attum kho lo. Kihnak timi biafang hi lumnak atlawm le tam kan chim duh ruangah ka hmanmi asi. Kihnak timi hi tah khawh zong asi lo. Lumnak tuhi tah khawh asi. Kihnak le lumnak hi aa ralchanh(opposite) mi zong ansi lo. Lumnak atam deuh cun, akik lo deuh ti aum, sihmanhseh law, kihnak atam deuh timi hi aum kho lo.

Siang hngakchia: Muihnak ti mi hi tah aum tiah na zum maw, saya?

Saya Pa: Zum ee. Zaan khi muihnak si loah zeidah si kun hnga.

Siang hngakchia: Saya, na palh tthan. Muihnak timi hi aum mi thil asi lo. Ceunak tu hi aum mi asi. Ceunak timi hi a tampi zong um khawh asi. A tlawm te zong um khawh asi. Ceunak aumlo nak tu khi muihnak tiah biangfang kan pek sawh i asi. Amah dang tein muihnak hi aum mi thil asilo. Va um sehlaw cu, a mui mi khi muihter chin angah ding asi, si ko lo maw?

Saya Pa: Si, zeiruang dah mah vialte cu na ka chimh theng?

Siang hngakchia: Thil na ruahning daan a palh tiah ka chim duh mi asi.

Saya Pa: Zeitin dah na palh na ka ti khawh?

Siang hngakchia: Thil na ruahning daan hi an i ralchanh (opposite). Nunnak le thihnak hi adang veve in aum na ti hna. Cun Pathian zong hi a ttha mi le ttha lomi in aum na ti fawn. Pathian ti mi hi rel khawh mi, tah khawh mi, le donghnak angei mi sawh men in na hmuh. Teihpaan nih cun ruahnak (thought) hmanh a fianter (explain) khawh ttunlo. Thihnak timi hi nunak he aa ralchanh tiah kan ruah ahcun, thihnak timi hi amah lawng aum khawh lo hi kan theih lo ruangah asi. Thihnak hi nunnak he aa ralchanh mi asilo. Nunnak a umlo ruang tu ah thihnak aum, sihmanhsehlaw, thihnak aumlo ruangah nunnak aum hlei lo. Cucaah thihnak timi hi amah dang tein a um kho lo. Nunnak adongh tu khi thihnak tiah kan auh i asi. Saya, na siangakchia pawl hi “minung hi zawng in ara mi kan si” timi hi na cawnpiak mi hna asi ko lo maw?

Saya Pa: Aw, si hen ta.

Siang hngakchia: Zawng khi duhsah tein minung ah aa thlen na mit in na hmu bal maw?

(A saya pa cu a siangakchia pa nih a chim duh mi kha a vun fiang thluahmah. Siang ngakchia pa tu cu merh zimziam in azoh i a lu alei (ka hmu ballo ti duhnak ah))

Siang hngakchia: Asi locun, zawng khi minung ah aa thlen lio na hmuh bal ve lo asi ahcun, “minung hi zawng in ara mi kan si” tiah na siang ngakchia pawl na chimh tawnmi hna hi, nangmah pumpak ruahnak le zumhnak na chimh mi hna asi ve ko lo maw? Teihpaan pyingiashin (Scientist) zong hi pastor te he nan ikhat ko hna lo maw?

(An khaan vialte an lau dih)

Siang hngakchia: Mah khaan chung hin tah, kan saya pa i a thluak a hmu bal mi nan um maw?

(An khaan vialte in an ni dih)

Siang hngakchia: Kan saya pa i a thluak thawng tah a hna in athei bal mi nan um maw? A tawng bal mi, a thawtnam a thei bal mi, silole arim athei bal mi tah nan um hna maw? Nan um rua lo. Asi lo ahcun, kan saya pa i a thluak hi, mit zong in hmuh khawh asi lo. Hna zong in theih khawh asi lo. A tawng bal mi zong kan umlo. A thawtnam a thei mi zong kan umlo. Arim athei bal mi zong kan umlo caah, amah nih achim ning bantuk tein kan ti ahcun, Teihpaan nih cun thlua na ngei lo aan ti, saya. Thluak na ngeih lo asi ahcun, zeitin dah ca na kan chimh mi pawl kan zumh khawh ti lai?

(An khaan vialte an dai dih. Saya pa nih cun siang ngakchia pa cu khuaruah har tukin azoh i)

Saya Pa: Zumhnak in ta thluak ka ngeih cu nan zumh ahauh ko lai, ka fapa.

Siang hngakchia: Mah bak cu si, saya. Minung le Pathian karlak i kan ipehtlaihnak hi ZUMHNAK asi. ZUMHNAK hi kan nunnak ah abiapi bik asi.

Cu hnu cun Pathian a zum lotu an sayapa cu Pathian a zumh i a piangthar.

Hi kong cu kum caan sau ngai a rau cangmi asi ko nain, a ttha tuk i ka von ttial tthan, a thei ciami kan tam lai i a thei rihlomi tthangthar mino zong kan tam lai ka zumh.

*Mah siang hngakchia pa a min cu Albert Einstein asi.

Source; God vs Science

photo crdit;God's Not Dead (film)

Sponsored AD