By;Thla Awr
April 23 2017
CHIN IT Free.com
Tuchan Khrihfa tampi cu Pathian bia i fiang huaha loin a nungmi kan tam tuk.
Biakinn pumh zong ah kan lungtak tein Pathian kan thangtthat kho tawn lo i a phungmen sawsawh in le kan ruahnak deuh in Pathian kan thangthat/biak tawnmi hi a poi tukmi asi. Pathian bia i fian huaha lo i nun hi cu ttih a nung ko. Bible sianginn kai in degree sangpi a la cangmi hna chungin cheukhat cu an thluak lawngin Pathian bia an theihngal hna i an thinlung takin an i fiang tuk hna lo. Cucaahcun an chimmi Pathianbia thawngttha pawl zong khi mi nunnak ah thlarau thazaang an pe kho hna lo. Cu bantuk Bible thiamsang pawl cu Farasi le Libral bantuk an si ko, Pathian bia cung zongah anmah fimnak an i rinh tuk caah an fimthiamnak lila in Sehtan nih a hlen beh tawn hna. Cun cheukhat cu pianthar an thiam tuk, Pathian bia chim cu an thiam tuk ko nain Pathian bia in an nung thiam lo, a chim lawng an thiam i a nun daan an thiam tilo caah an nun ah zohchuntlak an si kho tawn lo. Pathian rianttuantu le Thawngtha chimtu pawl khi na nunnak le na zumhnak caahcun i bochan tuk hna hlah. Na bochan tuk sual hna i an chimmi Pathian bia lawng kan i rinh sual ahcun, an chim bantuk in an nun kholo caan na hmuh tik hna ah le Pathian bia ning in an nun kholo caan ah na thachia ko lai (cheukhat Pathian rianttuantu saya pawl cu Beer din le zukhmuam hman hna hi zei a poi lo an ti i an i sum duh bak lo ko cu), amah hmanh nih mah tihin a um tiah sualnak lei lam hmanh ah na pial chin kho men. Cucaahcun Pathian lawng kha ibochan law Jesuh nunning lawng kha i zohchun ko.
Ho paoh nih an chimphuanmi Pathian bia pawl kha tampi ngaih khawh le theih khawh i zuam hna usihlaw, an tluk sual caan kan hmuh tik hna zong ah thachia loin kanmah tein kan zumhnak ah fek tein a dir khomi kan si khawhnak ding kha a biapi tuk. Cucaahcun mi chimmi Pathian bia lawng kha i rinh awk a ttha hrimhrim lo. Nangmah hrim nih Bible na rel peng ve aherh i nangmah tein Pathian bia a fiang khomi zumtu na si a herh. Zeitluk in Bible thiamsang hmanh va silaw nangmah fimnak na rinh ahcun Khrihfabu dohtu le soiseltu na si peng ko lai. Cu bantuk pawl cu Farasi bantuk an si. Pathian bia cu vawlei fimnak bangin thluak in cawn sawhsawh a ngah lo, thinlung in i fian a rak biapi deuh tuk. Cu i fian khawhnak ding caah kanmah tein Bible rel peng i lung tak tein kan fian khawh lomi kha Thiangthlarau kan hal ahcun akan bawmh hrimhrim lai i minung thluak nih a phanh khawh lomi Pathian biathuk le biafim pawl zong kha kan ifiang chin thluahmah ko lai. Minung i bochan loin Pathian lawng i bochan ding, minung chimmi Pathian bia nak in Bible ca i bochan deuh ding asi.
Aruang cu an chimmi Pathian bia kha Bible ca chung ah an lakmi asi caah zeitluk tampi an chim ko zongah an chimmi cungah Pathian bia a tling dih kholo, Pathian bia cu Bible ca lawng ah a tling tikha kan i fian aherh.
Cun, na Khrihfabu chung lawng ah Pathian bia na theih tawnmi lawng kha a tlamtling kho hrimhrim lo. A caan ahcun midang Khrihfabu zong ah i pum pah ko. Nan Khrihfabu chung i Pastor te le Khrihfa upa pawl nih Pathianbia an chim tawnmi lawng kha a za ko tiah i rinh hrim hlah. Kanmah timi chung lawng ah na thinlung le na ruahnak a um ahcun a bii tukmi hauhruang naa khumh ter tinak si. Pathian bia ruang ahcun Bu thleidannak thinlung ngei hrim hlah. Nan Khrihfabu asi lomi midang Khrihfabu chungin Pathian mihman an tampi khah. Pathia bia cu ho paoh sin in theih khawh i zuam ko, nain an chimmi Pathian bia pawl kha an dik dih lo sual ah nangmah tein Bible hmang in na fian thiam a herh ngai, Bible na relnak in siseh, cun midang chimmi Pathian bia chungin siseh, na fian lomi Pathian bia paoh cu lungtak tein thlacam law Thiangthlarau bawmh hal hmanh, an fian ter ko lai. Pathian bia cu kau piin theih aherh i thuk piin i fian chin a herh.
By ; Thla Awr
Sponsored AD
Loading...
