ပြည်တွင်းဓါတ်ပုံဆရာတွေရဲ့ ဓါတ်ပုံကို အွန်လိုင်းပေါ်ကနေတရားဝင် ဝယ်ယူနိုင်

ပြည်တွင်းဓါတ်ပုံဆရာတွေရဲ့ ဓါတ်ပုံကို အွန်လိုင်းပေါ်ကနေ တရားဝင်ဝယ်ယူနိုင်ပြီလို့ သိရပါတယ်။

ပြည်တွင်း Stock Photography ဝက်ဘ်ဆိုက် www.flaireyes.com ကနေ ဝယ်ယူနိုင်မှာဖြစ်ပြီး အဲဒီဝက်ဘ်ဆိုက်ကတော့ အရည်အသွေးမြင့်ပြီး တစ်မူထူးခြားတဲ့ မြန်မာ့ဓါတ်ပုံတွေကို တရားဝင် ဝယ်ယူအသုံးပြုချင် သူတွေအတွက် ဓါတ်ပုံရိုက် ကူးသူရဲ့ အားစိုက်ထုတ်မှု အတွက်ရော၊ ဝယ်ယူတဲ့ ကပ်စတမ်မာအတွက်ပါ မျှတတဲ့ဈေးနှုန်းနဲ့ ဝယ်ယူရရှိနိုင်အောင် ဆောင်ရွက်ထားတာလို့ ဝက်ဘ်ဆိုက်ရဲ့တာဝန်ရှိသူတစ်ဦးဖြစ်တဲ့ မနိုနိုအောင်က ပြောပါတယ်။ “အဓိက က ပြည်တွင်း ဓါတ်ပုံဆရာတွေ ရိုက်ကူးထားတဲ့ မြန်မာပြည်က ဒေသစုံ၊ အကြောင်းအရာစုံ ဓါတ်ပုံတွေကို အွန်လိုင်းကနေ ဝယ်ယူနိုင်မှာပါ” လို့သူကဆိုပါတယ်။

ဝက်ဘ်ဆိုက်ပေါ်က ဓါတ်ပုံဝယ်ယူဖို့ဆိုရင် အရင်ဆုံးကိုယ်လိုချင်တဲ့ ဓါတ်ပုံကို ဝက်ဘ်ဆိုက်မှာ ဝင်ရောက်ပြီး Search box မှာ အကြမ်းဖျင်း ရှာနိုင်မှာဖြစ်ပါတယ်။ ဒေသအလိုက် ဓါတ်ပုံတွေကိုလည်း တင်ထားပြီး ခေါင်းစဉ်တစ်ခုချင်းစီမှာလည်း ဝင်ကြည့်နိုင်မှာ ဖြစ်ပါတယ်။

“ကိုယ့်ရဲ့ လုပ်ငန်းမှာ ဓါတ်ပုံသုံးဖို့ လိုအပ်ချက်ရှိလာတာပဲ ဖြစ်ဖြစ်၊ ကိုယ့်ရဲ့ Presentation အတွက် အကြောင်းအရာကို အထောက်အကူပြုမယ့် ဓါတ်ပုံကောင်းကောင်းလေးတွေ လိုနေတယ်၊ ကြော်ငြာဒီဇိုင်း၊ ကိုယ့်ရဲ့ စီးပွားရေးနဲ့ စပ်ဆက်တဲ့ ဒီဇိုင်းတွေအတွက် ဓါတ်ပုံတွေ သုံးဖို့လိုတယ်၊ မိမိရဲ့ ခရီးသွားအေဂျင်စီကို ဆွဲဆောင်မှုရှိရှိ ကြော်ငြာဖို့ အရည်အသွေးမြင့် ဓါတ်ပုံတွေ လိုနေတယ်။ ဒါတွေကို Google Images မှာ လွယ်လွယ်ရှာလိုက်ရင်တော့ ရနိုင်ပါတယ်၊ ဒါပေမဲ့ ပုံတွေဟာ ဝါးနေနိုင်တယ်။ တစ်ချို့ပုံတွေ ရေစာတွေ ပါနေတယ်၊ ကိုယ်လိုချင်တာနဲ့ မကိုက်တဲ့ ပုံတွေလည်း ပါနိုင်တယ်၊ နိုင်ငံခြားက ပုံတွေဖြစ်နေနိုင်တယ်။ နောက်ပြီး စီးပွားရေး ရည်ရွယ်ချက်အတွက် အဲ့လို Google ကပုံတွေကို လွယ်လွယ် download ချ သုံးလိုက်မယ်ဆို ဓါတ်ပုံရိုက်ကူးတဲ့ လူရဲ့ မူပိုင်ခွင့်ကို ချိုးဖောက်ရာလည်း ရောက်ပါတယ်၊ ဒီဝက်ဘ်ဆိုက်မှာတော့ မြန်မာဓါတ်ပုံတွေကို တရားဝင် ဝယ်ယူနိုင်အောင် ဆောင်ရွက်ထားပါတယ်” လို့ သူကပြောပါတယ်။

ဝယ်လိုသူတွေအနေနဲ့ ဝယ်ယူချင်တဲ့ ဓါတ်ပုံဘေးမှာ Email request box ထဲ မိမိ email ကိုရိုက်ထည့်ပြီး Buy ဆိုတာနှိပ်ပြီး Payment စနစ်ရွေး ဝယ်ယူရမှာဖြစ်ပါတယ်။ ရေစာမပါဝင်တဲ့ အရည်အသွေးမြင့်ဓါတ်ပုံကို Flair Eyes က အဆိုပါ email ထံ ပို့ပေးမှာဖြစ်ပါတယ်။ ဓါတ်ပုံတစ်ပုံကို ကျပ် ၂၅,၀၀၀ က စတင်သတ်မှတ်ထားပြီး Visa, Master, MPU card များနဲ့ ဝယ်ယူနိုင်တဲ့အပြင် ဘဏ်အကောင့် မရှိသူတွေအတွက် နီးစပ်ရာ 123 Counters တွေမှာ ဝယ်ယူရရှိနိုင်တယ်လို့ သိရပါတယ်။ Flair Eyes အဖွဲ့ဟာ ဖန်တီးရာ ကနေ ကျင်းပခဲ့တဲ့ Startup Challenge 2017 မှာ ဆုရရှိခဲ့တဲ့ အဖွဲ့ဖြစ်တယ်လို့ သိရပါတယ်။

-ထွန်းထွန်း

Credit : Internet Journal